Татарстанда трассада сыра төягән йөк машинасына ут капкан – фото
Башта машинаның көпчәге янган, аннары ялкын прицепка күчкән.
Скопировать ссылку
(Казан, 21 ноябрь, «Татар-информ»). Мамадыш районында трассада йөк машинасына ут капкан, дип хәбәр итә Россия Гадәттән тыш хәлләр министрлыгының ТР буенча Баш идарәсе матбугат хезмәте.
112 бердәм диспетчерлык хезмәте номерына янгын турында хәбәр алгач, коткаручылар ярдәмгә ашыккан. М7 трассасының 931нче чакрымында сыра төягән “ДАФ” йөк машинасы хәрәкәт иткән вакытта көпчәгенә ут капкан. Йөртүче машинаны туктаткач, ут прицепка күчкән.
Урынга килеп җиткән янгын сүндерүчеләр утны тиз арада җиңгән. Янгын мәйданы 5 квадрат метр тәшкил иткән. Зыян күрүчеләр юк.
