Татарстанда "Транснефть-Синтез" заводы киләсе елда сафка басарга мөмкин
Р.Миңнеханов "Алабуга" МИЗда нефть-транспорт тармагы өчен продукция җитештерәчәк предприятие төзелеше белән танышты.
(Казан, 6 сентябрь. "Татар-информ"). Бүген "Алабуга" махсус икътисади зонасына эш сәфәре кысаларында Татарстан Республикасы Президенты Рөстәм Миңнеханов «Транснефть-Синтез» яңа заводының төзелеш мәйданчыгында булды. Республика җитәкчесе булачак завод җитәкчелеге белән аралашты, диелә Президентның матбугат үзәге хәбәрендә.
Инвестицион проект буенча әлеге предприятиедә турбулентлыкка каршы присадкалар җитештерү карала. Җитештерү күләме 3 мең тонна булачак дип планлаштырыла. Продукция нефть-транспорт тармагы предприятиеләренә сатылачак.
Рөстәм Миңнеханов төзелеш эшләрен карап чыкты, булачак завод җитәкчелеге белән сөйләште. «Транснефть-Синтез» вәкилләре производствоны 2019 елда эшләтеп җибәрү көтелүе турында хәбәр иттеләр.
Рөстәм Миңнехановны ТР Президенты ярдәмчесе Альберт Нәфигыйн, ТР икътисад министры Фәрит Габделганиев, "Алабуга" МИЗ генераль директоры Тимур Шаһивәлиев, «Транснефть-Синтез» компаниясе җитәкчелеге озата йөрделәр.
