Татарстанда тимер юлда 800 литрга якын дизель ягулыгы урлаган каракларны тотканнар
Җинаять эше кузгатылган, каракларга биш елга кадәр иректән мәхрүм ителү яный.
(Казан, 15 июнь, «Татар-информ»). Татарстанда тимер юлда 800 литрга якын дизель ягулыгы урлаган каракларны тотканнар. Бу хакта Казанның транспорт полициясе хәбәр итә.
Транспорт полициясе хезмәткәрләре Чаллыдагы Круглое поле станциясендә 140 литр дизель ягулыгы урламакчы булган коммерция оешмасының өч хезмәткәрен эләктергән.
Аларның элегрәк тә тепловозлардан ягулык агызып алулары, барлыгы 20 мең сумлык 778 литр дизель ягулыгы урлаулары ачыкланган.
Алар соңгы тапкыр Түбән Кама сәнәгать зонасында урнашкан Куйбышев тимер юлындагы Биклән станциясендә караклык белән шөгыльләнгән.
Җинаять эше кузгатылган, каракларга биш елга кадәр иректән мәхрүм ителү яный.
