Җәмгыять 24 апрель 2017 11:48

Татарстанда талпаннар сезоны ачылган

Узган ел талпаннар 15 апрельдә “уянган” булса, быел алар 3 көнгә иртәрәк активлашкан.

Скопировать ссылку

(Казан, 24 апрель, "Татар-информ", Чулпан Шакирова). Татарстанда биш кешене талпан тешләгән. Бу хакта “Татар-информ” хәбәрчесенә ТР Роспотребнадзор идарәсенең территорияне санитар саклау бүлеге башлыгы Луиза Борисова хәбәр итте.

"Быел талпаннар кышкы йокыдан 12 апрельдә уянды. Узган елда бу дата – 15 апрельгә туры килгән иде. Тереклек итү өчен талпанга +1-3 градус тирәсе җылылык җитә. Май уртасыннан алар үрчи башлый, бу чор июнь ахырына кадәр саклана. Талпан тешләү очракларының “пик” ноктасы да, гадәттә, шушы вакытка туры килә," – диде ул.

Луиза Олеговна әйтүенчә, энцефалит вирусын йөртүче урман бете (талпан) җирдән 1,5 метрдан биек булмаган куе үлән арасында яши. Шуңа күрә ачык болын яки тугай, урманга караганда да куркынычрак. Кояш нурлары туры төшә торган каен урманында талпаннар әз очрый. Нарат урманында бөтенләй дә юк диярлек. Талпаннарның туплану урыны – катнаш урманнар.

Талпан тешләү куркынычы күбрәк булган районнар да билгеле. Болар Татарстанның 30 төбәге – Азнакай, Аксубай, Актаныш, Алексеевск, Алабуга, Әгерҗе, Әлки, Әлмәт, Баулы, Бөгелмә, Биектау, Зәй, Лаеш, Ленининогорск, Менделевск, Минзәлә, Мөслим, Нурлат, Саба, Спас, Тукай, Теләче, Түбән Кама, Чистай, Чирмешән, Яңа Чишмә, Югары Ослан, Ютазы районнары һәм Казан, Чаллы шәһәрләре.

Исегезгә төшерәбез, 2015 елда республикада талпан кадалуның 6971 очрагы теркәлгән. Узган ел исә 6858 кешене урман бете тешләгән. Беренче елны энцефалит чирен бер кеше йоктырган булса, узган ел куркыныч авыруны эләктерүчеләр саны өчәү.

#Татарстан урманнары #талпан #Роспотребнадзор #энцефалит

Сәхифәләр

Татарстанда талпаннар сезоны ачылган