Татарстанда сөт җитештерү күләме 8 процентка арткан
Татарстанда быел 433 мең тонна сөт җитештерелгән, бу 2023 елга караганда, 8 процентка күбрәк. Сөт җитештерү күләме буенча Россия төбәкләре рейтингында республика беренче урында тора. Бу хакта Татарстан Авыл хуҗалыгы һәм азык-төлек министрлыгы матбугат хезмәте хәбәр итә.
«1 апрельгә мөгезле эре терлек, кош-корт, сарык һәм кәҗәләр саны узган елга караганда кимеде. Шул ук вакытта дуңгызларның һәм атларның баш саны буенча уңай динамика бар - үсеш 1 процент тәшкил итә. Күпчелек районнар сыерлар баш саны буенча, 2023 ел белән чагыштырганда, шул дәрәҗәдә яки савым сыерлары санын арттыруга ирешкәннәр», - дип билгеләп үттеләр министрлыкта.
Бүгенгә республиканың 187 хуҗалыгы цифрлы системалар белән эшли. Бу хуҗалыкларда 166 мең сыер асрыйлар, бу авыл хуҗалыгы оешмалары савым сыерларының 78 процентын тәшкил итә.