Җәмгыять 6 октябрь 2014 13:34

Татарстанда санитар чистарту һәм тәртипкә китерү буенча декада уздырыла

18 октябрьгә республикакүләм өмә үткәреләчәк

Скопировать ссылку

(Казан, 6 октябрь, «Татар-информ»). 2014 елның 8 октябреннән алып 18 октябренә кадәр Татарстан Республикасында территорияләрне санитар чистарту һәм тәртипкә китерү буенча декада уздырылачак. Бу хакта бүген Татарстан Республикасы Хөкүмәте Йортында уздырылган республика киңәшмәсендә Татарстан Республикасы экология һәм табигый ресурслар министры Артем Сидоров хәбәр итте.

Киңәшмәне барлык мунициципаль районнар белән видеоконференция режимында Татарстан Республикасы Президенты Рөстәм Миңнеханов уздырды.

Артем Сидоров билгеләп үткәнчә, кышка керер алдыннан бакча-паркларны, скверларны, яшел зоналарны, кешеләр күпләп ял итә торган урыннарны, ишегалларын һәм башка территорияләрне тәртипкә китерү планлаштырыла.

18 октябрьгә республикакүләм өмә үткәрү ниятләнә.

Татарстан Республикасы Президенты Рөстәм Миңнеханов чүплекләр янәшәсендәге территорияләрне, шулай ук санкцияләнмәгән чүплекләр барлыкка килгән урыннарны санитар чистартуга игътибар итәргә кушты. Аның сүзләренчә, көзге яңгырларга кадәр бу эшләрне тәмамларга кирәк.

Аннары ТР урман хуҗалыгы министры Алмас Нәзиров чыгыш ясады. Ул республикада скверлар һәм паркларда утырту өчен агачлар әзерләүгә тукталды. Рөстәм Миңнеханов бу мәсьәләгә җитди карарга кирәк дип белдерде, чөнки агачларны утырту белән генә эш бетми, аларның үсеп китүенә дә игътибар бирү зарур.

Бу хакта ТР Президенты матбугат хезмәте хәбәр итә.

Сәхифәләр

Татарстанда санитар чистарту һәм тәртипкә китерү буенча декада уздырыла