Икътисад 22 декабрь 2017 20:22

Татарстанда планлаштырылган торакның 95 процентка якыны сафка бастырылган

28 муниципалитетта 45 торак йорт төзелеше тулысынча тәмамланган.

Скопировать ссылку

(Казан, 22 декабрь, «Татар-информ»). 22 декабрьгә булган мәгълүматларга караганда, Татарстанда 2 млн 269,1 мең кв. м торак тапшырылган, бу планлаштырылганның - 94,5 проценты.

Бу хакта бүген республика Хөкүмәте йортында республикакүләм киңәшмәдә ТР төзелеш, архитектура һәм торак-коммуналь хуҗалык министры Ирек Фәйзуллин сөйләде. Чараны Татарстан Президенты Рөстәм Миңнеханов үткәрде, дип хәбәр итә республика башлыгы матбугат хезмәте.

Сафка бастырылган торак күләме узган елгы күрсәткечләргә туры килә. Шул ук вакытта 28 муниципалитетта 45 торак йорт төзелеше тулысынча тәмамланган, диде докладчы.

Социаль ипотека буенча 211 йорт сафка бастырылган, әмма 178е генә тапшырылган. Калган 33 объект файдалануга тапшыру өчен әзерләнә.

Арендага торак буенча планлаштырылган 17 торакның 16сы тапшырылган. Югары Ослан районында андый 9 торак төзелгән.

Күпфатирлы инвестицион торак программасы буенча барлыгы 19 йорт сафка бастырылган. Шәхси торак төзелеше программасы тулы күләмдә үтәлгән, диде министр.

Ятим һәм ата-ана тәрбиясеннән мәхрүм калган балалар өчен республика 305 фатирны милек итеп алган.

#Ирек Фәйзуллин #торак-коммуналь хуҗалыгы министры

Сәхифәләр

Татарстанда планлаштырылган торакның 95 процентка якыны сафка бастырылган