Татарстанда Онлайн энциклопедия әзерләнә
Онлайн энциклопедия “Татар халкының милли үзенчәлеген саклап калу” дәүләт программасы кысаларында әзерләнә.
(Казан, 8 декабрь, «Татар-информ», Рузилә Мөхәммәтова). Татарстан Фәннәр академиясенең Энциклопедия һәм төбәкне өйрәнү фәнни-тикшеренү институты Электрон татар энциклопедиясен әзерли. Бу хакта бүген “Татар-информ” мәгълүмат агентлыгында узган, “Татарстан Республикасы Дәүләт һәм муниципаль символлары” дип аталган белешмә китап басылып чыгуга багышланган матбугат конференциясендә Энциклопедия һәм төбәкне өйрәнү фәнни-тикшеренү институты директоры, тарих фәннәре докторы, профессор Искәндәр Гыйләҗев хәбәр итте.
“Безнең электрон энциклопедия энциклопедик басмага яңа караш, - диде ул. - Онлайн энциклопедия “Татар халкының милли үзенчәлеген саклап калу” дәүләт программасы кысаларында әзерләнә. Ул ике телдә булачак. Аңа дөньяның теләсә кайсы почмагыннан теләсә нинди интернетка тоташкан җайланма аша кереп булачак. Без моны татар телен саклау һәм үстерү юнәлешендә зур эшебез итеп күзаллыйбыз”.