Татарстанда музейга йөрүчеләр саны арткан – "Ватаным Татарстан" газетасы

(Казан, 22 апрель, "Татар-информ", "Ватаным Татарстан", Сәрия Мифтахова). Узган ел республикада музейларга йөрүчеләр саны 35 процентка арткан. Бу – 5 миллион 873 мең кеше дигән сүз. Соңгы егерме елда – иң зур сан. Былтыр Казан Кремле 3 миллионлап кешене кабул иткән. Татарстан мәдәният минис­тры Айрат Сибагатуллин югары уку йортларында гуманитар, социаль-­икъ­ти­­садый фәннәрдән белем бирүче укытучылар белән очрашуда шундый саннар җиткерде, дип яза "Ватаным Татарстан".

Ул Татарстанны чын мәгъ­нә­сен­дә “музей республикасы” дип атады. ”Бездә хәзер музейлар да тамашачы янына бара. Казан, Алабуга, Болгар, Зөядә ачык һавада музей фестивальләре, бәйрәмнәр оештырыла. Районнарда “Әдәби ишегалды” кебек чаралар да үткәрелә. Очрашуда күренекле шәхесләр дә катнаша. Урамда кино күрсәтү дә популярлашты. Дәүләт театрларында тамаша кылучыларның саны узган ел бер миллионнан артты”, – ди Айрат Сибагатуллин.

Шунысын әйтергә кирәк: мондый очрашулар Татарстан Вузара координация советы тәкъдиме бе­лән даими уздырыла. Бу юлы мә­дәният министрына үз юнәлеше турында сөйләргә туры килде. Аның чыгышыннан күренгәнчә, 2016 елда тупланма бюджеттан мәдәният өлкәсенә юнәлдерелгән чыгымнар 13,7 миллиард сумны тәшкил ит­кән. Федераль бюджеттан 563,2 миллион сум акча бүлеп бирелгән. Мәдәният өлкәсенә акча күбрәк бүлеп бирелә башлаган. 2012 елдан башлап барлыгы 226 клуб төзелгән, 2015 елдан 69ы төзек­лән­дерелгән. Узган ел Әлмәт, Чистай, Югары Ослан, Лаеш, Теләче районнарында биш мәдәният йорты тө­зелгән. Авыл клубларына 7,4 миллион сумлык тавыш җиһазлары сатып алынган. 12 районда театр кәнәфиләре яңартылган. Шактый гына кино заллары җиһазлан­ды­рыл­ган. Мәдәни мирас объектларын яңарту буенча да эш алып барыла. Былтыр мәдә­ният, сәнгать, кинематография өл­кә­­сендә эшләү­челәрнең уртача хез­мәт хакы 20 мең 361 сумны тәш­кил иткән. Эш хакы 3 процентка арткан.

Бүген республикада 43 мең кеше сәнгать, мәдәният өлкәсендә белем ала икән. Дөрес, монда югары уку йорты, техникумнарда гына түгел, музыка мәк­тәпләрендә укучылар да кер­тел­гән. Узган ел вузларда мәдәният юнә­леше буенча бәйгеләрдә бер урынга уртача 11 кеше дәгъва кылган. Сайлап алу яхшы, ләкин укып бетергәч, яшьләр авылларга кайтырга телиме икән? Яшь белгеч­ләр­гә нинди мөмкинлекләр тудырылган?

– Урта һәм югары уку йортларын тәмамлаган яшьләрнең 70 про­центы туган якларына кайта. Авылларда белгечләрне йорт бе­лән тәэмин итә алмыйбыз. Яшь кеше бер, ике ел эшли, хезмәт хакына карап, киләчәген үзе хәл итә. Күп­ләп белгечләр җитми дигән нәрсә юк, – диде министр.

Сүз уңаеннан, Казан дәүләт мәдәният һәм сәнгать университетын узган ел 270тән артык кеше тәмамлаган. Шуның нибары 33е генә авылга кайтып киткән. Ә югары уку йортына абитуриент­ларның 40 процентын авылдан кабул итәләр. Бу шәһәр студентларына караганда күбрәк. Бигрәк тә Әлмәт, Яшел Үзән, Кукмара студентлары актив. Ә менә Әлки, Менделеевск, Яңа Чишмә кебек районнардан укырга килүчеләр аз икән.