Татарстанда Мәүлид ән-Нәбигә багышланган иҗади бәйгегә эшләр кабул ителә
Җиңүчеләр дипломнар һәм акчалата премияләр белән бүләкләнә.
(Казан, 29 октябрь, "Татар-информ"). «Хозур» нәшрият йорты Мәүлид ән-Нәбигә багышланган иҗади бәйгегә эсселәр кабул ителүе турында искәртә. Бу турыда Татарстан Диния нәзарәте матбугат хезмәте хәбәр итте.
Кичә ахшам намазыннан соң Рабигыль-әүвәл ае керде. Бу мөбарәк ай кешелеккә иң соңгы һәм иң өстен Илче буларак җибәрелгән Мөхәммәд Пәйгамбәрнең туган көне белән истәлекле. Бәйрәм алдыннан Татарстан мөфтиятенең “Хозур” нәшрият йорты Мәүлид ән-Нәбигә багышланган иҗади бәйгегә эсселар кабул ителүе турында тагын бер кат искәртә.
Эссе форматында язылган уй-фикерләр татар һәм рус телләрендә кабул ителә. Конкурста теләгән һәр кеше катнаша ала (18 яшьтән өлкәнрәк булу һәм Россиядә яшәү шарт).
Конкурста җиңүчеләр дипломнар һәм акчалата премияләр белән бүләкләнәчәк:
- – беренче урын өчен – 10 мең сум;
- – икенче урын өчен – 5 мең сум;
- – өченче урын өчен – 3 мең сум.
Эшләрне islam_today@mail.ru электрон почтасына 6 ноябрьгә кадәр кабул ителә.
Конкурска нәтиҗәләр 9 ноябрьдә ВКонтакте битендә игълан ителәчәк.
