Татарстанда кыска вакытлы салкыннан соң аномаль җылы көтелә
Бу атнада Татарстанда тотрыксыз һава торышы көтелә – кыска вакытлы салкыннар аномаль җылы белән алышыначак. Явым-төшемнәр, бозлавык һәм җил фаразлана, дип хәбәр итә республиканың Гидрометеорология үзәге.
6 гыйнвар төнендә, шулай ук иртәгә иртән һәм көндез явым-төшем ихтималы аз. -15..-10 градус салкын була, түбән җирләрдә 18 градуска кадәр төшәчәк. Кайбер районнарда томан төшә. Циклон йогынтысында, көннең икенче яртысында, көнбатыш районнарда кар ява башлаячак. Җил секундына 14 метрга кадәр көчәя, буран була, күз күреме 1-2 километрга кадәр начарлана. Һава температурасы -10..-5 градус.
Чәршәмбе һәм пәнҗешәмбе көнне һава торышына атмосфера фронтлары һәм циклон тәэсир итәчәк. 8 гыйнварда кар, җепшек һәм һәм пыскак яңгыр явуы фаразлана. Урыны белән кабат буран чыга, ә җил тизлеге секундына 16 метрга кадәр көчәя. Температура әкренләп күтәрелә: төнлә -12..-7, иртәнгә таба -6..-1, ә көндез -2..+2 градус булачак.
9 гыйнварда җылыну дәвам итә, синоптиклар фаразлаганча, температура 10 һәм аннан да күбрәк градуска нормадан югары була. Җепшетү явым-төшемнәр дә алып килә – җепшек кар һәм яңгыр явачак. Тәүлек дәвамында һава температурасы -3..+2 градусны тәшкил итә, секундына 15-20 метр тизлектә көчле җил көтелә.
Якынча фаразлар буенча, атна ахырында температура 0 градус чамасы саклана. Урыны белән бераз явым-төшемнәр булырга мөмкин.
«Җепшек кар һәм яңгыр белән бергә, җепшек һава торышы аркасында түбәләрдән һәм башка авыш өслекләрдән кар һәм боз төшәргә мөмкин. Сак булыгыз!» – дип кисәтә Татарстанның Гидрометеорология үзәге.