Татарстанда коронавирус инфекциясе йоктыруның 71 яңа очрагы ачыкланган
60 кеше өендә дәвалана, 11 кеше хастаханәгә озатылган.
(Казан, 26 апрель, «Татар-информ»). Татарстанда коронавирус инфекциясе йоктыруның 71 яңа очрагы ачыкланган. Бу хакта ТР Президентының матбугат хезмәте җитәкчесе Лилия Галимова хәбәр итте.
«11 кеше хастаханәгә озатылган, 60 кеше өендә дәвалана,чөнки аларда авыру җиңел формада яки симптомнарсыз уза», - диде Галимова.
10 кеше инфекцияне чит илдә йоктырган, калган 61 кеше аны башка авырулар белән якыннан аралашканнан соң эләктергән. Коронавирус инфекциясе йоктырган 21 кеше — 30-50, дүрт кеше — 70-80, өч кеше - 80-90 яшьтә.
Казанда – 38, Түбән Кама районында – 7, Балтач районында – 5, Чаллыда – 4, Лаеш һәм Питрәч районнарында – өчәр, Биектау, Арча һәм Саба районнарында – икешәр, Яңа Чишмә, Алабуга, Чистай, Буа һәм Сарман районнарында берәр очрак ачыкланган.
Эпидемия башланганнан бирле 57 кеше терелеп, хастаханәдән чыгарылган.