Татарстанда Иж елгасында баткан балыкчының мәетен тапканнар
5 майда 54 яшьлек ир-ат балыкка киткән һәм югалган.
(Казан, 11 май, “Татар-информ”). Татарстанда Иж елгасында баткан балыкчыны таптылар, дип хәбәр иттеләр “Татар-информ” агентлыгына Россия Гадәттән тыш хәлләр министрлыгының Татарстан буенча баш идарәсе матбугат хезмәтендә.
Әгерҗе торак пунктында Иж елгасында 54 яшьлек ир-атның юкка чыгуы турындагы мәгълүмат 112 номеры буенча 5 майда хәбәр ителгән.
Коткаручыларга һәм полициягә югалган ир-атны эзләргә волонтерлар да булышкан.
Коткаручылар һәм волонтерлар берничә көн елга ярын тикшергән. Бу вакыт эчендә 8 чакрымнан артык яр буе, 800 кв метр сулык тикшерелгән.
Бары тик җиде көннән соң гына яр буеннан 3 метр ераклыкта һәм 2 метр тирәнлектә югалган ир-атның мәетен тапканнар.
Ир-атның үле гәүдәсен полиция хезмәткәрләренә тапшырганнар. Фаҗига сәбәпләре ачыклана.