Җәмгыять 18 гыйнвар 2010 17:11

Татарстанда инвалидлар 82 мең 112 шәхси программа белән тәэмин ителә

2009 елда Татарстан Республикасында Баш медицина-социаль экспертиза бюросы тарафыннан өлкәннәр өчен 83 меңнән артык шәхси тернәкләндерү программасы эшләнә

Скопировать ссылку

(Казан, 18 гыйнвар, “Татар-информ”, Ләйсән Әсәдуллина). 2009 елда Татарстан Республикасында Баш медицина-социаль экспертиза бюросы тарафыннан өлкәннәр өчен 83 меңнән артык шәхси тернәкләндерү программасы эшләнә. Инвалидларга шуларның 82 мең 112се бирелә. Эшкә сәләтле булган инвалидлар 45 мең 550 программа белән тәэмин ителә.
Баш бюродан “Татар-информ”га хәбәр ителгәнчә, узган ел физик мөмкинлекләре чикләнгән балалар өчен 9118 программа эшләнә. Шәхси тернәкләндерү программасын сорап, бюрога 8744 кеше мөрәҗәгать итә. Шунысын да ассызыклап үтәргә кирәк: өлкәннәр һәм балалар күп вакытта социаль тернәкләндерү чараларына, аерым алганда, техник реабилитация чараларына мохтаҗ.
Кеше бюрога икенче тапкыр тикшерү узарга килгәндә, белгечләр программада каралган тернәкләндерү чараларын тормышка ашыруга бәя бирә. Узган ел медицина киңәшләренең 71 проценты гына үтәлә. 2008 ел белән чагыштырганда, бу 7 процентка күбрәк. Балалар арасында тернәкләндерү чараларын тормышка ашыру дәрәҗәсе 78 процент белән бәяләнә.

Сәхифәләр

Татарстанда инвалидлар 82 мең 112 шәхси программа белән тәэмин ителә