Татарстанда илкүләм проектларны финанслау 2021 елга 7,4 млрд сумга арттырылачак
Өстәмә акчаны «Демография» һәм «Сәламәтлек саклау» илкүләм проектларын гамәлгә ашыруга юнәлдерәчәкләр.
(Казан, 22 июль, «Татар-информ»). 2019-2021 елларда Татарстанда илкүләм проектларны гамәлгә ашыруга 52,1 миллиард сум акча юнәлдереләчәк. Шуның 34,1 миллиарды – федераль, 18 миллиарды ТР бюджетыннан бүлеп биреләчәк. Бу хакта «Татар-информ» агентлыгына республика икътисад министры Фәрит Габделганиев хәбәр итте.
«Илкүләм проектларны финанслауны 7,4 миллиард сумга арттыру турында карар кабул ителде. Өстәмә акчалар «Демография» һәм «Сәламәтлек саклау» илкүләм проектларын гамәлгә ашыруга юнәлдереләчәк», - дип ачыклык кертте Габделганиев.
Министр сүзләренчә, өстәмә финанслау илкүләм проектларны гамәлгә ашыруның нәтиҗәлелеген арттырырга һәм татарстанлыларның тормыш сыйфатын күтәрергә мөмкинлек бирәчәк.