Татарстанда хәләл туризмны үстерергә тәкъдим иттеләр
Бүгенге көндә Татарстандагы өч шифаханәгә «Хәләл» стандартлары сертификаты бирелгән.
(Казан, 9 декабрь, «Татар-информ», Гадел Әхмәтҗанов). Бүген «Хәләл — яшәү рәвеше» Бөтенроссия конференциясендә Татарстанда хәләл туризмны үстерү турында тәкъдим иттеләр. Әлеге фикерне Казанның Мәрҗәни мәчете имам-хатыйбы Мансур хәзрәт Җәләлетдин әйтте.
«Чит илләргә барганда мөселман кешесе Ислам дине кагыйдәләренә туры килә торган ял итү урыннары эзли. Анда хәләл кунакханәләр кыйммәт. Ни өчен хәләл ял итүне үзебездә оештырмаска? Табигатебез дә матур. Хәләл шифаханә, балалар лагерьлары, ял итү базалары, кунакханәләр санын арттырырга кирәк», — диде ул.
«Хәләл» стандартлары комитеты рәисе урынбасары Илгиз Баһаветдинов сүзләренчә, бүгенге көндә «Хәләл — яшәү рәвеше» юл картасы кысаларында Татарстанда өч шифаханә сертификацияләнгән.
«Хәләл тормыш рәвеше» Бөтенроссия конференциясен Татарстан Диния нәзарәтенең Хәләл стандартлары комитеты, Ислам юридик үзәге һәм сәламәтлекләре чикле кешеләргә «Добрый мир для всех» ярдәм күрсәтү үзәге оештырды. Конференциядә ислам финанслары һәм хәләл индустриядә эшләгән кешеләр катнашты.