Татарстанда фтизиатрларга кытлык бар – Алексей Алексеев
Узган елда тармакка 9 белгеч эшкә алынган.
(Казан, 23 март, “Татар-информ”, Гөлнар Гарифуллина). Татарстанда туберкулезны дәвалаучы медицина кадрларына ихтыяҗ бар. Бу хакта бүген “Татар-информ” мәгълүмат агентлыгында туберкулезга каршы көрәш көненә багышланган матбугат конференциясендә Республика туберкулезга каршы клиник диспансер баш табибы Алексей Алексеев хәбәр итте.
Баш табиб профильле дәвалау учреждениеләренең кадрлар белән 60 процент дәрәҗәдә тәэмин ителүен билгеләп узды. Аның әйтүенчә, кадрлар мәсьәләсе аеруча кискен торган шәһәр һәм районнар да бар. “Кайбер урыннарда кадрлар һәм табиблар белән тәэминат 40-45 процент кына. Узган елда яңа 9 белгечне эшкә алдык, шул исәптән 6 сы Республика туберкулезга каршы диспансерда эшли. Тагын өчесе филиалларга җибәрелде”, - диде Алексей Алексеев. Ул быел тагын 4 яңа белгеч көтелүен әйтте.