Татарстанда эшкә сәләтле халыкның кайсы районнарда күбрәк үлгәне билгеле

Сәламәтлек саклау министры Мөслим, Кама Тамагы, Чүпрәле, Буа, Азнакай, Сарман, Ленингорск, Чистай үзәк район хастаханәләренең баш табибларына көчләрен амбулатор звено эшенә, табибларның һөнәри компетенциясен арттыруга юнәлтергә кушты.

Скопировать ссылку

(Казан, 26 гыйнвар, «Татар-информ», Гөлнар Гарифуллина). Татарстанда эшкә сәләтле халыкның кайсы районнарда күбрәк үлгәне билгеле. Аларны Татарстан сәламәтлек саклау министры Марат Садыйков коллегия утырышында әйтеп чыкты.

Эшкә сәләтле халык арасында үлемнең иң югары күрсәткечләре Яңа Чишмә (100 мең кешегә — 862,4), Югары Ослан (100 мең кешегә — 821,1), Кайбыч (100 мең кешегә — 736,5), Сарман (100 мең кешегә — 791,7), Минзәлә (100 мең кешегә — 794) районнарында теркәлгән.

«2021 елда эшкә сәләтле яшьтәге кешеләр арасында үлем күрсәткечләре өч процентка арткан һәм 18,2 процент тәшкил итә», — дип белдерде Марат Садыйков.

Ул республикада һәр районда үлем күрсәткечләренә анализ ясалганын әйтте. Җирле үзидарә башлыклары, хастаханә баш табиблары белән берлектә, районнарда вазгыятьне яхшырту буенча чаралар ниятләп куйган.

Министр Мөслим, Кама Тамагы, Чүпрәле, Буа, Азнакай, Сарман, Ленингорск, Чистай үзәк район хастаханәләренең баш табибларына көчләрен амбулатор звено эшенә, табибларның һөнәри компетенциясен арттыруга юнәлтергә кушты. «Моның белән даими шөгыльләнеп тору зарур», — диде Марат Садыйков.

Сәхифәләр

Татарстанда эшкә сәләтле халыкның кайсы районнарда күбрәк үлгәне билгеле