Татарстанда Чиләбедән китерелгән йомыркаларны кош гриппына тикшерү нәтиҗәләре билгеле
Быел Чиләбе өлкәсе кошчылык фабрикасында түбән патологияле кош гриппы ачыкланган.
(Казан, 4 март, «Татар-информ», Гөлнар Гарифуллина). Кош гриппын кисәтү максатыннан, Татарстанның 32 районында Чиләбедән сатып алынган йомыркалар тулысынча тикшерелгән. Нәтиҗәләре тискәре булган. Бу хакта «Татар-информ» агентлыгында матбугат конференциясендә ТР Министрлар Кабинеты каршындагы Баш ветеринария идарәсе башлыгы урынбасары Габделхак Мотыйгуллин әйтте.
Аның сүзләренчә, быел Россиядә түбән патологияле кош гриппы Чиләбе өлкәсе кошчылык фабрикасында ачыкланган. Белгечләр әйтүенчә, бу югары патологияле вирус белән чагыштырганда, алай куркыныч түгел, кошлар 100 процент үлми, итен термик эшкәртүгә җибәрергә ярый.
Габделхак Мотыйгуллин, шулай ук, быел Башкортстанның Туймазы районында «Агро Гусь» җәмгыятендә кош гриппы табылганын әйтте. «Владимирда махсус лабораториядә тикшергәннән соң, ул очрак расланмаган», — диде.
Галерея: Пресс-конференция «Профилактика птичьего гриппа и других особо опасных заболеваний»