Татарстанда өч медицина хезмәткәре коронавируска каршы прививка ясаткан
Табибларның өчесе дә Казанда эшли, аларда вакцинаның тискәре йогынтысы сизелмәгән.
(Казан, 13 октябрь, «Татар-информ», Эвелина Киселёва). Татарстанда өч медицина хезмәткәре Covid-19 яңа коронавирус инфекциясенә каршы «Спутник V» прививкасын ясаткан. Бу хакта «Татар-информ» агентлыгына ТР Сәламәтлек саклау министрлыгының матбугат хезмәтеннән хәбәр иттеләр.
«Өч медицина хезмәткәре яңа коронавирус инфекциясенә каршы прививка ясатты. Барысы да үзләрен яхшы хис итә», - дип искәрттеләр ведомствода.
Табибларның өчесе дә Казанда эшли, аларда вакцинаның тискәре йогынтысы сизелмәгән.
Агентлык чыганагы мәгълүматлары буенча, республикага 40ка якын доза кайткан, ә монысы – сынау партиясе.