Татарстанда быел 14 урман янгыны теркәлгән

Янгыннарны мониторинглау системасы урманчыларга мондый хәвеф-хәтәрләрне оператив төстә ачыкларга мөмкинлек бирә.

Скопировать ссылку

(Казан, 4 сентябрь, «Татар-информ», Гөлнар Гарифуллина). Татарстанда быел 14 урман янгыны килеп чыккан.

Татарстан урман хуҗалыгы министрының беренче урынбасары Илгизәр Зарипов журналистларга ул янгыннарның өскә күтәрелмәве өчен чаралар күрелгәнен әйтте. Барлыгы 160 гектар мәйданда ут чыккан. «Барлык янгыннар йөгерек кенә булды, югарыга үрмәләмәде, урмандагы җир катламына гына зыян килде», — диде ул.

Быел, шулай ук, 1 меңнән артык термик нокта да теркәлгән, бу, узган елга караганда, 1,7 тапкыр күбрәк, былтыр 600 ләп исәпләнгән.

Илгизәр Зарипов апрельнең икенче яртысыннан һава температурасы урманчылар өчен бик үк кулай булмавын да искәртте. «Май–июньдә бик каты корылык һәм эссе булды. Ул вакытта республиканың көньяк-көнчыгышында югары класслы янгын куркынычы булуы ачыкланды», — диде.

Ул янгыннарны мониторинглау системасы урманчыларга мондый хәвеф-хәтәрләрне оператив төстә ачыкларга мөмкинлек биргәнен әйтте. Нәтиҗәдә, барлык янгыннар да беренче сәгатьләрендә үк сүндерелгән.

«Республиканың көньяк-көнчыгышында таулы урыннарда чыккан янгыннарны сүндерергә янгын сүндерү техникасы үтә алмаганлыктан, янгын икенче тәүлеккә сүндерелде», — дип белдерде Илгизәр Зарипов.

Чагыштыру өчен былтыр Татарстанда өч урман янгыны теркәлгән булган.

Сәхифәләр

Татарстанда быел 14 урман янгыны теркәлгән