Татарстанда Болгар, Казан ханлыгы чоры каберташлары музее ачылырга мөмкин
Борынгы каберташлар тупланган каталог унбиш томлык булып бастырылачак.
(Казан, 18 февраль, «Татар-информ», Зилә Мөбәрәкшина). Татарстанда Болгар, Казан ханлыгы чоры каберташларын музеен булдыру күздә тотыла.
«Болгар дәүләте һәм Казан ханлыгы чоры ташлары әле дә исән. Бөтен дөньяда шундый тәҗрибә бар: иске таш музейга куела, ә аның урынына күчермәсе ясап куела. Бәлки, киләчәктә шундый музей да булыр. Нөсхәләрне киләчәк буынга күреп калырга мөмкинлек булыр иде», — диде Татарстан Фәннәр Академиясе академигы Дания Заһидуллина.
Аның әйтүенчә, Мирасханә язма һәм музыкаль мирас үзәгендә каберташ язмаларыннан торган каталоглар бар, аларны 1940-1950 еллардан ук галимнәре туплаган булган. «Шуларны җыеп, бастырып чыгару проекты бар. Без аны тормышка ашырырбыз дип уйлыйбыз. Якынча унбишләп китап чыгару күздә тотыла», — диде галимә.
Филология фәннәре кандидаты Азат Ахунов соңгы дүрт елда илледән артык зиратларны өйрәнгән: Киров, Самара, Саратов өлкәләре, Казахстан, Үзбәкстан. «Барлыгы 80гә якын авыл зиратларын йөреп чыктык. Җыйган мәгълүматлар буенча электрон каталогны төзү эшләре бара», — дип сөйләде ул «Татар-информ» хәбәрчесенә.
«Хәзерге вакытта Татарстанда өч меңгә якын зират бар, шуларның 500е — тарихи зират булып санала. Җир астында күмелеп калган ташлар да бар, алар әйбәтрәк сакланган. Иң борынгы каберташ XIII гасырга карый, без, нигездә, XVIII–XIX гасыр каберташларын өйрәнәбез», — диде Азат Ахунов хәбәрчегә.