Татарстанда биржа сәүдәсе 10 миллиард сумнан артып киткән

Россиядә биржа сәүдәсен үстерү буенча сынау төбәге булган Татарстан Республикасы эре сәнәгать компанияләре белән системалы хезмәттәшлекне дәвам итә. 2025 ел нәтиҗәләре буенча төбәктә «ЦТС биржасы» АҖ мәйданчыгында сатуларның гомуми күләме 10 млрд сумнан артып киткән, дип хәбәр итә биржаның матбугат хезмәте.

Төп нәтиҗәләрнең берсе СИБУР төркеме предприятиеләре белән хезмәттәшлек булды. Бер ел эчендә холдинг 90 млн сумнан артык күләмдә полипропилен һәм полиэтилен төяп җибәрү буенча 34 килешү үткәргән. Уңышлы старт якларга биржа сатуларының алга таба үсешен билгели торган юл картасын расларга мөмкинлек биргән.

Сәүдә мәйданчыгы генераль директоры Никита Захаров билгеләп үткәнчә, компания аерым килешүләрдән системалы партнерлыкка күчә. Сибур белән юл картасы һәм «Татнефть» һәм «ТАИФ-НК» белән килешүләр — 2026 елда продукция күләмен һәм ассортиментын киңәйтергә мөмкинлек бирәчәк конкрет эш планы ул. Аның сүзләренчә, базар лидерлары һәм Татарстан Республикасы Сәнәгать һәм сәүдә министрлыгы ярдәме төбәк икътисадында биржа механизмының кирәклеген раслый.

Агымдагы елда башка флагманнар белән дә эш активлашты. ТР Сәнәгать һәм сәүдә министрлыгы оештырган киңәшмәләр нәтиҗәләре буенча «Татнефть» һәм «ТАИФ-НК» компанияләре белән 2026 елга планнар билгеләнгән.

ЦТС биржасының Казан филиалы җитәкчесе Дмитрий Золотов ассызыклаганча, биржа өчен эре компанияләрнең аны сәүдә мәйданчыгы гына түгел, ә озак вакытлы сатуны планлаштыру коралы итеп күрүе принципиаль яктан мөһим булып тора. Биржа үтә күренмәле бәя куюны, товарларның киң номенклатурасына керү мөмкинлеген һәм гадел конкуренцияне тәэмин итә. Якын киләчәккә бурыч — Татарстанның кече һәм урта бизнесы чималдан гарантияле файдалану мөмкинлеге алсын өчен максатларны сыйфатлы итеп тормышка ашыру.

Исегезгә төшерәбез, Татарстанда сынау проекты 2025 ел башында ТР Рәисе Рөстәм Миңнеханов кушуы буенча старт алды, ул төп товарларга бәя куюны үтә күренмәле итү бурычын куйды. Хәзерге вакытта мәйданчыкта 175 подрядчы һәм 308 тәэмин итүче теркәлгән. Төзелеш материаллары сегменты (9,5 млрд сумнан артык) алда бара, аннан соң металлар (500 млн нан артык) һәм агач материаллары (100 млн нан артык) килә. Кайбер позицияләр буенча бәяләр башлангыч бәядән 20-50 процентка кимегән.

Биржа сәүдәсен үстерү бәяләрне тотрыкландыруга, базарның үтә күренмәлелеген арттыруга һәм ил масштабларында объектив индикаторлар булдыруга ярдәм итәчәк. ТР Рәисе билгеләп үткәнчә, республика алдында сәнәгать продукциясе күләмен 6 трлн сумнан 10 трлн сумга кадәр арттыру бурычы тора, һәм биржа механизмнары моңа үз өлешен кертергә тиеш.