Җәмгыять 3 июль 2018 11:20

Татарстанда бирелә торган эшкә яраксызлык кәгазьләренең 35 проценты – электрон рәвештә

Узган ел белән чагыштырганда, быел электрон “больничный”лар саны 50 мәртәбә арткан.

Скопировать ссылку

(Казан, 3 июль, Татар-информ", Гөлнар Гарифуллина). Татарстанда көн саен 1300дән артык электрон эшкә яраксызлык кәгазе бирелә. Бу барлык “больничный”ларның якынча 35 проценты. Бу хакта бүген Татарстанның Министрлар Кабинетында узган брифингта билгеле булды.

РФ Социаль иминиятләштерү фондының Татарстан буенча бүлеге идарәчесе Рамил Гайзатуллин 2017 елның 1 июленнән Россиядә эшкә яраксызлык буенча электрон документлар бирүне күздә тоткан 86нчы федераль закон үз көченә кергәнен искәртте. Проект гамәлгә ашырыла башлаганнан бирле, Татарстанда 72 628 электрон “больничный” рәсмиләштерелгән.

Аның әйтүенчә, эшкә яраксызлык буенча электрон документ аның элекке кәгазь варианты белән бертигез юридик көчкә ия. Татарстанда көненә барлыгы 3760 вакытлыча эшкә яраксызлык кәгазьләре бирелә. Аның 1300е электрон форматта, узган ел белән чагыштырганда, бу 50 мәртәбә артык. Илнең 85 төбәге арасында, Татарстан Кемерово, Липецк, Белгород өлкәләреннән соң, электрон кәгазьләр бирү буенча 4нче урында.

“Пациент өчен иң мөһим өстенлеге – электрон документны югалту, бөгәрләү куркынычы юк, табибларның имзаларын җыю, мөһер суктыру кирәкми. Табиб документны тутырганда хата җибәрсә дә, яңадан сырхауханәгә барып, имза җыеп йөрү мәшәкатьләре юк. Хезмәткәр үзе, я эш урынындагы хисапчы сырхауханәгә шалтыратып, хатаны төзәтү турында хәбәр итә ала. Сырхауханә төзәтелгән мәгълүматларны шундук фондка юллый”, - дип белдерде Рамил Гайзатуллин.

#больничный #хезмәткә вакытлыча яраксызлык турындагы белешмә

Сәхифәләр

Татарстанда бирелә торган эшкә яраксызлык кәгазьләренең 35 проценты – электрон рәвештә