Татарстанда бәясе бер миллиард сумнан артык булган Балалар онкохирургия үзәге төзеләчәк
Яңа медицина учреждениесендә республиканың барлык шәһәр-районнарыннан яман шеш белән авыручы балаларга операция ясаячаклар һәм дәвалаячаклар.
(Казан, 28 сентябрь, «Татар-информ», Валерия Белова). Татарстанда бәясе бер миллиард сумнан артык тәшкил иткән Балалар онкохирургия үзәге төзеләчәк. ТР сәламәтлек саклау министры Марат Садыйков «Татар-информ» агентлыгына биргән интервьюсында шул хакта хәбәр итте.
«Беренче чиратта, без Татарстан Республикасында Балалар онкохирургия үзәген төзү проектын карыйбыз. 2018 елның 1 гыйнвары мәгълүматлары буенча, республикада зарарсыз шеш табылган 8 мең 273 бала исәптә тора. Бер ел дәвамында Республика балалар клиник хастаханәсендә 400гә якын нәни пациентка операция ясала. Яңа үзәк йөз урынга исәпләнәчәк», - дип аңлатты ведомство башлыгы.
