Авыл 5 сентябрь 2014 23:22

Татарстанда бөртекле культуралар барлык мәйданнарның 82 процентында җыелган

Бер гектардан уртача 22,3 центнер уңыш чыга

Скопировать ссылку

(Казан, 5 сентябрь, «Татар-информ»). Татарстанда бөртекле культуралар барлык мәйданнарның 82 процентында җыелган, бер гектардан уртача 22,3 центнер уңыш чыга. Бүген ТР Президенты үткәргән видеоконференция режимындагы республика киңәшмәсендә әнә шундый мәгълүматлар яңгырады.

Вице-премьер - Татарстан авыл хуҗалыгы һәм азык-төлек министры Марат Әхмәтов шәрехләп узганча, соңгы көннәрдә республикада яуган яңгырлар урып-җыю эшләренә комачаулаган. "Урып-җыюны тәмамлап, көзге культураларны чәчеп өлгерүчеләр өчен һава торышы менә дигән. Уҗымнар шыта, туфрак дымга туена, - дип билгеләп үтте Марат Әхмәтов. - Ә икмәкләре басуда булучыларга шартлар шәптән түгел".

Марат Әхмәтов китергән мәгълүматлар буенча, бүгенге көндә республикада 1,27 млн гектар мәйданда уңыш җыелган - бу барлык мәйданнарның 82 проценты дигән сүз. Амбарларга барлыгы 2,84 миллион тонна икмәк салынган, бер гектардан уртача 22,3 центнер уңыш чыга. Марат Әхмәтов алдагы 5-6 көндә, чагыштырмача әйбәт һава торышы көтелгәндә, урып-җыю эшләрен көн саен 20-30 мең гектар мәйданда башкарырга кирәклеген әйтте. Барлыгы 280 мең гектар мәйданда суктырасы калган.

Апас, Нурлат һәм Әлки районнары урып-җыюны тәмамлаган, Буа һәм Кайбыч районнарында да эшләр тәмамлану алдында. Шул ук вакытта, төп басымы көзге түгел, ә сабан культураларына ясаган районнар артта калучылар рәтендә.

Татарстан Президенты Рөстәм Миңнеханов, ТР авыл хуҗалыгы һәм азык-төлек министры докладын шәрехләп, һава торышының нинди булуына карамастан, урып-җыюны тәмамларга кирәк дип билгеләп үтте. Ул авыл хезмәтчәннәрен һава торышы биргән һәр мөмкинлекне басуларда эшләү өчен файдаланырга чакырды.

Бу хакта ТР Президенты матбугат хезмәте хәбәр итә.

Сәхифәләр

Татарстанда бөртекле культуралар барлык мәйданнарның 82 процентында җыелган