news_header_top
Руc Тат
16+
news_header_bot
news_top
Җәмгыять 2 декабрь 2018 10:00

Татарстанда авылда яшәүче ике меңгә якын ана бер тапкыр бирелә торган яңа түләүләр алган

Компенсация алу өчен гариза, паспорт, банкта ачылган счет реквизитлары, бала туу турындагы таныклыкның күчермәсе кирәк.

Скопировать ссылку

(Казан, 2 декабрь, «Татар-информ»). Авылда яшәүче беренче баласын тапкан 1631 хатын-кыз, шулай ук гаиләләрендә өченче сабыйлары дөньяга килгән 317 ана республика матди ярдәм күрсәтү үзәкләренә бер тапкыр бирелә торган яңа түләүләр юллап мөрәҗәгать иткән. Бу хакта бүген ТР Хезмәт, халыкны эш белән тәэмин итү һәм социаль яклау министрлыгының матбугат хезмәтеннән хәбәр иттеләр.

«Быел республикада мондый хатын-кызларның саны 2,5 меңнән артып китәр дип фаразлана. Аларның 2 меңгә якыны беренче балалары туу уңаеннан компенсация алачак, 400дән артык гүзәл зат өченче сабыен табар дип көтелә», - диелә матбугат хезмәте хәбәрендә.

Бер тапкыр бирелә торган яңа түләүләр республикада ТР Президенты Рөстәм Миңнеханов карары белән быелның башында гамәлгә кертелде. Ул 25 яшькә кадәр – беренче һәм 29 яшькә кадәр өченче баласын тапкан хатын-кызларга бирелә. Әлеге хатын-кызлар авылда өч елдан да ким яшәмәскә һәм шунда теркәлергә тиеш. Беренче балага компенсациянең күләме – 50 мең, өченче сабыйга 100 мең сум тәшкил итә.

Компенсация алу өчен гариза, паспорт, банкта ачылган счет реквизитлары, бала туу турындагы таныклыкның күчермәсе кирәк. Гаризалар яшәү урыны буенча республика матди ярдәм күрсәтү үзәкләрендә кабул ителә.
 

#пособие
news_right_1
news_right_2
news_bot