Татарстанда аномаль җылылыкка алмашка -12 градуска кадәр төнге салкын киләчәк
Антициклонның көнбатыш перифериясе йогынтысында Татарстанда аномаль җылылыкка алмашка салкын һава торышы киләчәк. Бу хакта Татарстан Гидрометеорология һәм әйләнә-тирә мохитне күзәтү үзәге тараткан фараздан билгеле булды.
Сишәмбе, чәршәмбе һәм пәнҗешәмбе, 26, 27 һәм 28 ноябрьдә, төбәктә явым-төшем ихтималы аз. Төнге һәм иртәнге сәгатьләрдә урыны белән томан төшәргә мөмкин. Юлларның аерым участокларында бозлавык барлыкка киләчәк.
Алдагы төндә республикада һава температурасы -3..-8 градус тәшкил итәчәк. 27 һәм 28 ноябрьдә төнлә һава температурасы -4..-9 градус, ә Татарстанның көнчыгышында -12 градуска кадәр көтелә. Көндез 0..-5 градуска кадәр фаразлана.
Метеорологларның якынча мәгълүматлары буенча, җомга һәм шимбә көннәрендә, 29 һәм 30 ноябрьдә, Татарстанда һава торышына чираттагы атмосфера фронты йогынты ясый башлаячак: республиканың кайбер районнарында бераз кар, җепшек кар көтелә. Юлларда урыны белән бозлавык сакланачак.
Бу вакытта температура фоны сизелерлек үзгәрми. Төнлә термометр баганасы -4, -9 градуска кадәр төшә (29 ноябрьдә көнчыгыш районнарда аязганда һава торышы -12 градуска кадәр). Көндез һава температурасы -4 градустан + 1 градуска кадәр була.