Татарстанда аномаль салкын һава торышы саклана, кайбер районнарда томан була
Бүген Татарстанда аномаль салкын һава торышы саклана. Көндез явым-төшем ихтималы аз, республиканың кайбер районнарында томан фаразлана. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.
«5 гыйнварда төнлә һәм көндез томан төшәчәк», - дип кисәтте синоптиклар.
Җил төньяк-көнбатыштан, көнбатыштан исә, аның тизлеге секундына 3-8 метрга кадәр була. Төнлә һәм иртән һава температурасы -20..-25 градус, аязганда -28 градуска кадәр. Көндез һава температурасы -16..-21 градус.
Моннан тыш, Татарстанда яшәүчеләрне юлларда бозлавык булуы турында кисәттеләр. Татарстан Рәисе Рөстәм Миңнеханов республикада яшәүчеләргә һәм кунакларга начар һава шартларында юлларда сак булырга киңәш итте.