Җәмгыять 13 июнь 2026 17:56

Татарстанда 400 меңнән артык фермер һәм шәхси ярдәмче хуҗалык бар

Скопировать ссылку

Татарстанда бүгенге көндә 2 656 фермер хуҗалыгы һәм 398 мең тирәсе шәхси ярдәмче хуҗалык эшли. Бу хакта ТР Хөкүмәте йортында узган киңәшмәдә Татарстан Республикасы авыл хуҗалыгы һәм азык-төлек министры урынбасары Нияз Хурамшин хәбәр итте, дип җиткерә ТР Рәисе матбугат хезмәте.

Киңәшмәне Татарстан Рәисе Рөстәм Миңнеханов үткәрде, анда ТР Премьер-министры Алексей Песошин да катнашты.

Хурамшин сүзләренчә, кече хуҗалык формаларында республикадагы терлекләрнең өчтән бер өлеше тупланган. Шулай ук бәрәңге һәм яшелчә җитештерүнең төп өлеше дә аларга туры килә – бу сегментта фермер һәм шәхси ярдәмче хуҗалыкларның өлеше 75 проценттан артып китә.

Кече хуҗалык формаларының үсешенә дәүләт ярдәме булыша, дип билгеләп үтелде. 2026 елда турыдан-туры ярдәм күләме 300 миллион сумга – 1,8 миллиард сумга кадәр арттырылды. Бу сумманың 688 миллион сумы шәхси ярдәмче хуҗалыкларга ярдәм итүгә юнәлтелгән. Акчаларның төп өлеше сыерлар асрау өчен каралган.

Ярдәмнең иң популяр юнәлешләренең берсе – мини-фермалар төзү. 2025–2026 елларда республикада 94 миллион сумлык дәүләт ярдәме белән 108 шундый объект төзелгән. Иң күп мини-фермалар Арча районында – 16, Алексеевск районында – 11, Чүпрәле һәм Чирмешән районнарында – алтышар объект барлыкка килгән.

2026 елдан Татарстанда ярдәмнең яңа төре – үгез бозаулары сатып алуга субсидияләр гамәлдә. Түләү күләме бер башка 35 мең сум тәшкил итә, әмма бер шәхси ярдәмче хуҗалык 15 баштан да күбрәк терлек ала алмый.

Программадан Кукмара, Балтач, Әлки, Әтнә, Мамадыш һәм Теләче районнарында яшәүчеләр актив файдаланган. Бу районнарда барлыгы меңнән артык терлек сатып алынган.

Субсидияләр алу өчен икенче сайлап алу этабы июнь азагында игълан ителергә тиеш. Бу максатларга тагын 11 миллион сум каралган.

Сәхифәләр

Татарстанда 400 меңнән артык фермер һәм шәхси ярдәмче хуҗалык бар