Татарстанда 2019 елда үлем күрсәткече югары һәм түбән районнар билгеле
Татарстанда гомуми үлем күрсәткечләре, 2018 ел белән чагыштырганда, 5,2 процентка түбән.
(Казан, 24 гыйнвар, «Татар-информ», Гөлнар Гарифуллина). 2019 елда Татарстанда кеше үлеме күрсәткечләре югары һәм түбән районнар билгеле. Аларны коллегия утырышында Татарстанның сәламәтлек саклау министры Марат Садыйков атады.
Ул Татарстанда гомуми үлем күрсәткечләре 1 мең кешегә 11 очрак нисбәтендә булганын әйтте. «Бу, 2018 ел белән чагыштырганда, 5,2 процентка түбән. Бу 2 мең сакланып калган гомер дигән сүз», — диде министр.
Ун муниципаль берәмлектә — Питрәч, Яр Чаллы, Казан, Түбән Кама, Балтач, Әлмәт, Биектау, Арча, Алабуга, Лаеш районнарында — халыкның табигый үсеше теркәлгән.
Үлемнең иң югары күрсәткеләре Чүпрәле, Кама Тамагы, Тәтеш, Яңа Чишмә, Балык Бистәсе, Чирмешән, Кайбыч, Актаныш районнарында теркәлгән.
Марат Садыйков әйтүенчә, 2015 ел белән чагыштырганда, эшкә сәләтле яшьтәге кешеләрнең үлеме 15,3 процентка азрак. 0 дән 17 яшьтәге балалар үлеме соңгы биш елда 35,6 процентка кимегән.
Аналар үлеме ике тапкыр кимегән. Министр Арча һәм Теләчедә ике очрак теркәлгәнен искәртте.