Татарстанда 2019 ел чәчү кампаниясенә 10 меңнән артык трактор ремонтланачак
Республиканың кайбер авыл хуҗалыгы предприятиеләрендә прицеплы, сөрә һәм чәчә торган техникаларны ремонтлауны төгәлләделәр.
(Казан, 27 декабрь, “Татар-информ”). Республикада 2019 ел чәчү кампаниясенә 10 меңнән артык трактор, 2,7 мең комбайн, алтышар мең чәчү техникасы һәм культиватор ремонтлау күздә тотыла. Бу хакта “Татар-информ”га Татарстан Авыл хуҗалыгы һәм азык-төлек министрлыгында хәбәр иттеләр.
“20 декабрь мәгълүматлары буенча, республикада ремонтланырга тиешле тракторларның 41, чәчкечләрнең 58, чәчү комплексларының 33, культиваторларның 60, комбайннарның 13 проценты төзекләндерелгән”, — диде Татарстан авыл хуҗалыгы һәм азык-төлек министрлыгының инженер-техник тәэмин ителеш бүлеге җитәкчесе Ришат Булатов.
Техниканы язгы чәчүгә әзерләү өчен 440 млн сумлык запас частьләр алынган.
Министрлык фаразлары буенча, әлеге максатларга чыгымнар 1,8 млрд сумны тәшкил итәчәк. Шул ук вакытта министрлыкта чыгымнарны авыл хуҗалыгы машиналары детальләрен ремонтлап киметергә була дип саныйлар.
Алар сүзләренчә, республиканың машина төзелеше предприятиеләре (кече һәм урта бизнесны кертеп) чит ил техникасына ике меңләп деталь әзерләүне, трактор һәм комбайннарга капиталь ремонт үткәрүне үзләштергән.