Татарстанда 16 мең сыерга исәпләнгән 30 яңа терлекчелек комплексы барлыкка киләчәк
Марат Җәббаров республикада тәүлеккә 4 мең тоннадан артык сөт җитештерелгәнен әйтте.
(Казан, 19 август, «Татар-информ», Зилә Мөбәрәкшина). Татарстанда якынча 16 мең сыерга исәпләнгән 30 яңа терлекчелек комплексы төзеләчәк. Бу хакта #ТатарстанОнлайн онлайн тапшыруында ТР премьер-министры урынбасары — авыл хуҗалыгы һәм азык-төлек министры Марат Җәббаров сөйләде.
«Без яңа терлекчелек комплекслары төзергә ниятлибез, планнар зурдан. Терлекнең баш санын арттыруга гына түгел, аның җитештерүчәнлегенә дә басым ясаячакбыз. Шуңа күрә яңа технологияләр, цифрлаштыру, ашату белән идарә итү системасын гамәлгә кертәчәкбез», — диде ул.
Министр сүзләренчә, республикада тәүлеккә 4 мең тоннадан артык сөт җитештерелә, бу сан, узган елгы күрсәткеч белән чагыштырганда, 102,8 процент тәшкил итә.
«Соңгы елларда республикада авыл хуҗалыгы өлкәсендә зур эшләр башкарыла. Россиянең һәр 15 литр сөте Татарстаннан дип әйтергә була, шуңа да Татарстан Россиянең башка субъектлары арасында сөт җитештерү буенча беренче урынны алып тора. Россия сөтенең гомуми күләменең 6 проценттан артыгы Татарстанда җитештерелә», — диде ул.
Марат Җәббаров Татарстанда җитештерелгән сөтнең барысы да диярлек республика заводларында эшкәртелгәнен әйтте. «Бездә егермегә якын сөт заводы бар. Аларны соңгы елларда яңарттылар, бу эш хәзерге вакытта да алып барыла. Мәсәлән, Казан сөт комбинаты тәүлеккә мең тонна продукция эшкәртергә әзер. Бүгенге көндә ул 400 тоннага якын сөт эшкәртә», — дип йомгаклады ул.