Татарстанда 135 мең кеше өй яны участокларында Конституциягә тавыш биргән
Ачык һавада тавыш бирү участоклары бүген соңгы көн эшли.
(Казан, 30 июнь, «Татар-информ»). Татарстанда сайлау участокларына килгән 1,8 млн кешенең 135 меңгә якыны РФ Конституциясенә төзәтмәләр кертү өчен йорт яны территорияләрендә тавыш биргән. Бу хакта Татарстан Үзәк сайлау комиссиясе рәисе Андрей Кондратьев хәбәр итте.
Аның сүзләренчә, Татарстанда чатырларда һәм автобусларда җиһазландырылган 427 тавыш бирү мәйданчыгы эшли. Бу участоклар Роспотребнадзорның барлык таләпләренә дә туры килә. «Көн дәвамында тавыш бирү урыннарын, тартмаларны, кабинкаларны һәм күчмә тартмаларны дезинфекция сыекчалары белән чистартып торалар. Көн ахырында, комиссиянең эше беткәч, дезинфекция җайланмалары белән җиһазландырылган махсус бригада килә һәм участокны, диварларны һәм тавыш бирү өчен технологик җиһазларны чистарта», — диде Андрей Кондратьев.
Россия Конституциясенә төзәтмәләр кертүгә тавыш бирү өчен Татарстанда 65 территориаль һәм 2,8 мең участок сайлау комиссиясе эшли. Республикада 2,9 млн кеше тавыш бирү хокукына ия.