Татарстан урманчыларының белемнәрен тест аша тикшергәннәр
Тест административ протокол төзүгә, урманны тернәкләндерүгә багышланган.
(Казан, 30 июль, "Татар-информ", Айгөл Шәйхлисламова). Бүген Кукмара районы Лубян авылында урманчылар слетында Татарстан районнары урманчыларының белем дәрәҗәсе беренче тапкыр тест сынавы ярдәмендә тикшерелде. Бу хакта "Татар-информ" хәбәрчесенә Татарстанның урман хуҗалыгы министрлыгының оештыру эшләре бүлеге начальнигы Наталья Тюкаева әйтте.
"Бүген урманчылар да балалар белән беррәттән тест үтә. Бу - профессия буенча осталыкны тикшерү бәйгесе. Тест 20 сораудан тора. Урманчылар административ хокук бозу турында протокол, урманны ясалма рәвештә тернәкләндерү проекты төзеп күрсәтәләр", - диде Наталья Тюкаева.
Урманчылар үткән өч этап нигезендә нәтиҗә балы исәпләп чыгарыла. Нәтиҗә ясагач, җиңүчеләрне билгелиләр. "Аларга иртәгә шулай ук почет грамотасы тапшырабыз", - диде Наталья Тюкаева.
Урманчыларның белем дәрәҗәсен тикшерү Татарстанның урман хуҗалыгы министры кушуы буенча үткәрелә. Тестны барлыгы 31 урманчы - җитәкче эшләгән. "Бу беренче тапкыр оештырыла", - диде Наталья Тюкаева.