Татарстан теннисчысы Дубайда халыкара турнирда ике тапкыр җиңүче булды
Марат Шәрипов Dubai Junior Championships турнирында бер-бер артлы биш көндәшне отты.
(Казан, 23 гыйнвар, "Татар-информ"). Россия җыелма командасы составында чыгыш ясаучы Татарстан спортчысы Марат Шәрипов Dubai Junior Championships халыкара теннис турнирында ике тапкыр җиңүче булды. Бу турыда Татарстан Спорт министрлыгы матбугат хезмәте хәбәр итте.
14-19 гыйнварда узган ярышта ялгыз разрядта Марат бер-бер артлы биш көндәшне җиңеп, турнирның «алтын»ын яулады. Финалда Шәрипов киеренке көрәштә (4:6, 6:1, 7:6) Бөекбританиядән килгән Джоэль Пиерлионинны җиңде.
Парлы разрядта Марат Шәрипов Данил Ибраһимов белән дуэтта чыгыш ясады. Алар финалда Казахстан теннисчылары Ростислав Гальфингер һәм Бекзат Усипбековны 6:4, 6:4 исәбе белән җиңде.