Татарстан Спорт министрлыгы Казанда күнегүләр җыенын кабул итәргә әзер
Инфраструктура тәкъдим итүдән тыш, спортчылар арасында үзара тәҗрибә уртаклашу һәм балалар спортын үстерү дә күздә тотыла.
(Казан, 2 июль, «Татар-информ», Артур Шипилов). Татарстан Республикасы Спорт министрлыгы Казанда спорт объектлары эшчәнлеген яңадан башлау өчен Россиянең башка төбәкләреннән килгән спортчылар катнашында күнегүләр җыенын кабул итәргә әзер. Татарстан спорт министрының беренче урынбасары Хәлил Шәйхетдинов шулай дип белдерде.
«Без төрле төбәкләрдә вазгыять төрле булуын аңлыйбыз. Шунлыктан башка төбәкләрдән һәм ил җыелмасыннан спортның төрле төрләре буенча заявкалар күп килә. Без, барлык саклык чараларын күреп һәм тиешле шартлар булдырып, барысын да үзебезгә чакырабыз. Объектларның үз эшчәнлеген яңадан башлап җибәрүе зарур, бу шулай ук безнең яшь спортчылар өчен үзара тәҗрибә уртаклашу мәйданы һәм үрнәк тә булачак», - диде Шәйхетдинов.