Татарстан синоптиклары кабат томан, буран һәм юлларны кар басу турында кисәтә
Бүген кич, иртәгә төнлә һәм көндез Татарстанда чираттагы тапкыр һава шартлары начарлану фаразлана. Бу хакта Татарстан Гидрометеорология үзәге хәбәр итә.
Урыны белән республикада, шул исәптән Казанда да, 1 декабрьдә кичке сәгатьләрдә, 2 декабрьдә төнге һәм иртәнге сәгатьләрдә томан төшәчәк, дип билгеләп үтә синоптиклар.
Бүгенге көн белән чагыштырганда, шимбә болытлы булачак. 2 декабрьдә иртәнге һәм көндезге сәгатьләрдә урыны белән көчле кар яву һәм күз күреме 1000 метрдан да кимрәк булган бураннар көтелә. Юлларны кар басачак.
Элегрәк «Татар-информ» ял көннәрендә Татарстанда бураннар, томан һәм бозлавыклы тотрыксыз һава торышы көтелә, дип хәбәр иткән иде. Республика Дәүләт автоинспекциясе атна ахырында катлаулы юл шартлары турында кисәтте.