Татарстан синоптиклары буран һәм кар көртләре хакында кисәтә
ТР Гидрометеорология һәм әйләнә-тирә мохитне күзәтү идарәсе һава шартларының бозылуы хакында кисәтү таратты.
Скопировать ссылку
(Казан, 24 декабрь, «Татар-информ»). Иртәгә, 25 декабрьдә, Татарстан территориясендә төнлә һәм көндез урыны белән буран һәм күз күременең сизелерлек начарлануы көтелә. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.
Моннан тыш, көньяк-көнчыгыштан көчле җил исәчәк, җилнең тизлеге урыны белән секундына 17 метрга кадәр җитәр дип көтелә. Республика юлларында бүгенге кебек үк кар көртләре хасил булачак.
- Моңа кадәр Татарстан синоптиклары көнчыгышка, Уралга таба хәрәкәт итүче антициклонны көнбатыш циклон алмаштырыр, ул исә үзе белән кар бураннары алып килер дип кисәткән иде.