Татарстан сәламәтлек саклау министры Әлмәт балалар хастаханәсендә булган
Биредә дәваланучы һәм шушы көннәрдә дөньяга килгән сабыйларны бәйрәм белән котлап, истәлекле бүләкләр тапшырган.
(Әлмәт, 2 июнь, "Татар-информ", "Әлмәт таңнары"). Кичә Халыкара балаларны яклау көне уңаеннан район башлыгы Айрат Хәйруллин Татарстан сәламәтлек саклау министры Марат Садыйков белән шәһәрнең балалар хастаханәсендә кунак булган. Бу турыда җирле басма хәбәр итә.
Алар биредә дәваланучы һәм шушы көннәрдә дөньяга килгән сабыйларны бәйрәм белән котлап, истәлекле бүләкләр тапшырды, шулай ук дәвалану шартлары белән танышып, табиблар белән аралашкан.
Кунаклар хастаханәне дә карап чыккан. Учреждение өр-яңа җиһазлар белән тәэмин ителгән, кабинетлар якты, табиблар һәр балага игътибар бүлә һәм күңелләрен биреп хезмәт куя.