Татарстан Рәисе: Көчле укытучы сыйфатлы белем бирә

Скопировать ссылку

Татарстан Рәисе Рөстәм Миңнеханов 2025 елга Дәүләт Советына еллык юлламасында педагог кадрлар әзерләү һәм укытучы абруен күтәрүнең әһәмиятен әйтте.

«Укытучысыз мәктәп – коры бина гына ул. Белем һәм тәрбия процессында педагогларның әһәмияте зур. Көчле укытучы сыйфатлы белем бирә. Аларның эш нәтиҗәсе – безнең яшьләрнең уңышлары», – диде.

Рөстәм Миңнеханов республика горурланырлык укучылар бүген залда булуын билгеләп үтте. Тимур Таҗиев һәм Михаил Краюшкин — Төрекмәнстанда математикадан халыкара олимпиадада алтын медальгә ия булучылар. Гыймран Абдуллин — информатикадан халыкара олимпиадалар җиңүчесе. Александра Ромашова Кытайда химиядән халыкара олимпиадада җиңү яулаган.

«Үз юнәлешләрегездә үсешегезне дәвам итегез! Сезнең башлангычларда һәрвакыт ярдәм итәрбез. Уңышлар!» – дип мөрәҗәгать итте Татарстан Рәисе.

Рөстәм Миңнеханов республикада мәгариф учакларын төзү һәм төзекләндерү дәвам итүен әйтте. Быел 11 яңа мәктәп ачылган, 51 мәктәптә капиталь ремонт булган.

Сәхифәләр

Татарстан Рәисе: Көчле укытучы сыйфатлы белем бирә