news_header_top_970_100
16+
news_header_bot_970_100

Татарстан Рәисе грантлары конкурсының иң популяр 5 юнәлешен атадылар

Гражданлык җәмгыятен үстерүгә ТР Рәисе грантларын бирү конкурсында катнашучылар күбесенчә биш төп юнәлеш буенча гариза тапшыра. Социаль юнәлешле коммерцияле булмаган оешмаларга ярдәм итү буенча Республика ресурс үзәге башкарма директоры Светлана Салмина «Татар-информ» агентлыгында узган матбугат конференциясендә шулай дип белдерде.

«Зур игътибарга ия булган төп юнәлеш – социаль хезмәт күрсәтү, социаль ярдәм һәм гражданнарны яклау. Шулай ук гражданнарның сәламәтлеген саклау һәм сәламәт яшәү рәвешен пропагандалау да игътибар үзәгендә. Татар милли мәдәниятен һәм традицияләрен саклау һәм үстерү һәрвакыт беренче өчлеккә керә. Гражданлык җәмгыяте институтларын үстерү һәм гаиләгә, ата-аналарга, балаларга ярдәм итү дә популяр юнәлешләр арасында», – диде ул.

Елдан-ел бу биш категория конкурста иң күп катнашучыларны колачлый, дип искәртте Салмина.

Татарстанда апрель аенда 2025 елда гражданлык җәмгыятен үстерүгә ТР Рәисе грантларын бирү буенча конкурс игълан ителде, аның гомуми бюджеты 158 миллион сумнан артып китә. Бәйгенең төп максаты гражданлык җәмгыятен үстерүдә катнашучы социаль юнәлешле коммерцияле булмаган оешмаларга дәүләт ярдәмен тәэмин итүдән гыйбарәт.

autoscroll_news_right_240_400_1
autoscroll_news_right_240_400_2
news_bot_970_100