Татарстан Президенты тантаналы төстә WorldSkills җиңүчеләре белән очраша
"Без сезнең һәрберегезгә ышандык, сез булдырдыгыз!" - диде Президент.
(Казан, 26 сентябрь, "Татар-информ", Алсу Исмәгыйлева). Татарстан Республикасы Президенты Рөстәм Миңнеханов бу минутларда WorldSkills 45нче дөнья чемпионаты җиңүчеләре, призерлары һәм экспертлары белән тантаналы төстә очраша. Чара Казан Кремлендә үтә.
"Ворлдскиллс" чемпионатында Россия җыелмасы икенче урынны алды һәм бу җиңүгә Татарстаннан катнашучылар да зур өлеш кертте. Без сезнең һәрберегезгә ышандык, сез булдырдыгыз!" - диде тантаналы чарада катнашучыларны сәламләп Президент.
Рөстәм Миңнеханов чемпионат мирасының Татарстанда кадрлар үсешенә әле озак еллар хезмәт итәчәген аңлатты. "Сез икътисадның реаль секторында кирәк булачаксыз, сез - безнең горурлык", - диде ул чемпионатта катнашучыларга.
Президент чемпионатта җиңүне карьера старты һәм алдагы җиңүләр нигезе дип атады.
- WorldSkills 45нче дөнья чемпионатында Татарстан вәкилләре өч призлы урын һәм сигез медальон алды.