Татарстан Президенты Нидерландның Икътисад министрлыгы вәкиле белән фикер алышты
«Без алга таба да Россия-Нидерланд мөнәсәбәтләре кысаларында хезмәттәшлекне үстерергә әзер», - диде Рөстәм Миңнеханов.
(Казан, 2 апрель, «Татар-информ»). Татарстан Президенты Рөстәм Миңнеханов Нидерландның Климат өлкәсендә икътисад һәм сәясәт министрлыгының Генераль секретаре Маартен Кампс белән хезмәттәшлек мөмкинлекләре турында фикер алышты. Бу хакта Татарстан Президентының матбугат хезмәте хәбәр итә.
Очрашу High Tech Campus югары технологияләр кампусы мәйданчыгында узды. Анда элегрәк Татарстан Президентына Signify компаниясеннән Казанның бердәм яктырту мохите концепциясен тәкъдим иткән иделәр.
Рөстәм Миңнеханов Югары технологияләр кампусы тудыра торган тәэсирләргә игътибар итте. Ул Нидерланд Корольлегенең Россиядәге илчесе Рене Джонс -Боска илгә чакырганы һәм сәфәрне оештыруда күрсәткән ярдәмнәре өчен рәхмәтен белдерде.
Моннан тыш, ул республиканың чит ил бизнесы белән актив хезмәттәшлек итүен һәм төбәктә үз производстволарын ача торган чит ил компанияләренә ярдәм итүен җиткерде. «Без алга таба да Россия-Нидерланд мөнәсәбәтләре кысаларында хезмәттәшлекне үстерергә әзер», - дип йомгаклады Рөстәм Миңнеханов.
Нидерландның Климат өлкәсендә икътисад һәм сәясәт министрлыгының Генераль секретаре Маартен Кампс үз чиратында хезмәттәшлекнең яңа нокталарын эзләү мөһимлеге турында белдерде. Нидерланд Россиянең зурлыгы буенча өченче сәүдә партнеры, ә Татарстан белән инде озак еллар эшли, дип өстәде ул.