Татарстан Президенты Катарның Россиядәге илчесе белән очрашты
Рөстәм Миңнеханов республикада Катар белән мөнәсәбәтләр үсешен югары бәяләүләрен әйтте.
(Казан, 18 декабрь, «Татар-информ»). Бүген Татарстан Президенты Рөстәм Миңнеханов Катар Дәүләтенең Россиядәге Гадәттән тыш һәм Тулы вәкаләтле илчесе Фахад Мөхәммәт Әл-Аттый белән очрашты. Очрашу Татарстан Хөкүмәт Йортында узды. Бу турыда республика җитәкчесенең матбугат хезмәте хәбәр итә.
Алар Россия-Катар мөнәсәбәтләре кысаларында киләчәк хезмәттәшлек мәсьәләләре буенча фикер алышты. Сүз уңаеннан, узган ел ике ил арасында дипломатик мөнәсәбәтләр урнашуга утыз ел тулды. Президент сүзләренчә, республикада Катар белән мөнәсәбәтләр үсешен югары бәялиләр.
Шулай ук Рөстәм Миңнеханов кунакны бүген билгеләп үтелә торган Катар Милли көне белән котлады.
