Рәсми Татарстан 16 май 2018 18:25

Татарстан Президенты еллык керемнәр турындагы декларацияләрдә төп хатаны әйтте

Хаталарның 90 проценты игътибарсызлык яки дөрес тутырмауда. 5-10 проценты гына кайбер фактларны яшереп калудан гыйбарәт, ди Президент.

Скопировать ссылку

(Казан, 16 май, “Татар-информ”, Чулпан Шакирова). Рөстәм Миңнеханов җитәкчеләрнең еллык керемнәре турындагы декларация тутыруда ясалган хаталар турында әйтте. Бу хакта ул бүген Кремльдә узган Коррупциягә каршы көрәш эше буенча комиссия утырышында белдерде.

“Еллык керемнәр турындагы декларация тапшыру - бу кемнеңдер теләге генә түгел, ә федераль закон. Без аның таләпләрен төгәл үтәргә тиешбез. Декларация тутырганда, бик күп хаталар кылына. Аның 90 проценты игътибарсызлык яки дөрес тутырмауда. 5-10 проценты гына кайбер фактларны яшереп калудан гыйбарәт”, - диде Президент.

Рөстәм Миңнеханов шулай ук җитәкчеләрне туганлык мөнәсәбәтләрен күрсәтүдән дә качмаска чакырды.

“Без артык игътибар бирми торган икенче момент ул – мәнфәгатьләр конфликты. Хөрмәтле коллегалар, әгәр сезнең туганлык яки башка мөнәсәбәтләрегез бар икән, сез моны күрсәтергә, теркәргә тиешсез. Без аны белеп торырга тиеш. Мондый тәҗрибә инде сынала. Сез һәрнәрсәне тиешле дәрәҗәдә рәсмиләштерергә тиешсез. Әгәр нинди дә булса консультация кирәк икән, юридик хезмәт инструкция бирергә әзер”, – диде ул.

Рөстәм Миңнеханов шулай ук узган ел министрлар һәм вице-премьерлар югарылыгындагы 9 дәүләт хезмәткәренең җәзага тартылуын әйтеп узды. Шулай ук 370 дәүләт һәм муниципаль хезмәткәр җавапка тартылган.

“Алда әйткәнемчә, төп җитешсезлекләр – юридик яктан дөрес тутырылмаган документларда”, - диде Президент.

#Миңнеханов #Болгар #коррупция #еллык керем турында декларация

Сәхифәләр

Татарстан Президенты еллык керемнәр турындагы декларацияләрдә төп хатаны әйтте