news_header_top_970_100
news_header_bot_970_100

Татарстан Президенты 1 нче сыйныфка нинди портфель белән укырга кергәнен искә төшерде

Бүген Татарстан Президенты Рөстәм Миңнеханов Яшел Үзәндә республика август киңәшмәсе алдыннан "Мәктәпкә җыенырга ярдәм ит" акциясе кысаларында 1 нче сыйныф балаларына портфельләр бирү тантанасында катнашты. Форсаттан файдаланып, үзенең дә 1 нче сыйныфка баруы белән бәйле балачак хатирәсен сөйләде.

"Безнең бистәдә дусларым мәктәпкә 1 нче сыйныфка китте. Миңа 6 яшь иде. Әтигә: "минем дә керәсем килә" дидем. Сумкам да юк иде, олы абыйның сумкасы бар иде, шул портфель белән мәктәпкә бардым. Беренче тапкыр мәктәпкә барганны гел искә алам", - диде Президент.

Рөстәм Миңнеханов "Мәктәпкә җыенырга ярдәм ит" акциясе әһәмиятен әйтте.

"Бик кирәкле акция. Быел 55 мең бала 1 нче сыйныфка бара. Бөтен ата-ана да баласын тиешле дәрәҗәдә әзерләргә көче җитеп бетми, муниципаль берәмлек башлыкларына иганә ярдәме күрсәтүчеләргә рәхмәт. Бу игелекле эш", - диде.

"Балаларны котлыйм, укуларында уңышлар  телим. Иң кирәкле әсбаплар белән тәэмин ителәсез. Бу көн хәтерегездә калыр дип ышанам", - дип мөрәҗәгать итте Рөстәм Миңнеханов.

"Мәктәпкә җыенырга ярдәм ит" акциясе 7 ел элек Татарстан Президенты ярдәме белән 2007 елдан гамәлгә ашырыла. 15 ел эчендә 224 мең 1 нче сыйныф һәм 2-11 сыйныф укучысына ярдәм күрсәтелгән.

Тантаналы чарада РФ мәгърифәт һәм фән министры урынбасары Татьяна Васильева һәм башка кунаклар катнашты.

news_right_column_1_240_400
news_right_column_2_240_400
news_bot_970_100