news_header_top_970_100
Руc Тат
16+
news_header_bot_970_100
Мәдәният 19 март 2023 13:39

Татарстан Минск шәһәрендәге халыкара күргәзмәдә ике йөздән артык китап тәкъдим итәчәк

Скопировать ссылку

22-26 март көннәрендә Татарстан китап нәшрияты делегациясе Минск шәһәрендә утызынчы Халыкара китап күргәзмә-ярминкәсендә катнашачак. Татарстан Республикасы стендында төрле жанрдагы 200дән артык китап урнаштыру ниятләнә. Булачак вакыйга турында «Татар-информ»га «Татарстан китап нәшрияты»ның баш мөхәррир урынбасары Венера Шәмсетдинова сөйләде.

«Мондый масштабтагы күргәзмәләрдә катнашу - безнең эшчәнлегебезнең мөһим стратегик юнәлешләренең берсе дип әйтергә була. Чөнки безнең үз продукциябезне тәкъдим итү генә түгел, ә хезмәттәшләребез белән тәҗрибә уртаклашу мөмкинлеге дә бар», – диде ул.

Шәмсетдинова билгеләп үткәнчә, ярминкәләргә китаплар җыелмасы укучыларның ихтыяҗын һәм кызыксынуларын исәпкә алып төзелә. Шуңа күрә хәзерге вакытта укучылар арасында популяр булган басмалар сайлап алына. Аның сүзләренчә, Минскида булачак күргәзмә дә искәрмә булмаячак. Татарстан «БелЭкспо» күргәзмә үзәгендә яңа китаплар, балалар һәм яшүсмерләр өчен бестселлерлар, тарихи басмалар һәм туган якны өйрәнү әдәбияты, сүзлекләр һәм татар теле буенча кулланмалар, бүләккә бирелә торган китап-альбомнар, татар классиклары китаплары һәм башка бик күп басма тәкъдим итәчәк.

«Татарстан китап нәшрияты»ннан тыш, масштаблы чарада Россиянең тагын 120 нәшрияты катнашачак. Россия стендының ике сәхнәсендә 60тан артык чара үткәреләчәк. Китаплар презентацияләре, дискуссияләр, түгәрәк өстәлләр, әдәби укулар, паблик-токлар, шулай ук Россиянең хәзерге язучылары һәм шагыйрьләре чыгышлары оештырылачак.

autoscroll_news_right_240_400_1
autoscroll_news_right_240_400_2
news_bot_970_100