Икътисад 29 август 2018 19:00

Татарстан Милли банкы: Июльдә республикада азык-төлек бәяләре төште

Татарстанда еллык инфляция ил буенча уртачадан түбәнрәк.

Скопировать ссылку

(Казан, 29 август, «Татар-информ»). Июльдә Татарстанда азык-төлек бәяләре ел дәвамында 0,1 процентка төшкән. Шул ук вакытта Россия буенча бу чорда азык-төлек бәяләре 0,5 процентка арктан, ә инфляция күрсәткече 2,5 процент тәшкил иткән. Бу турыда журналистларга республиканың Милли банкында хәбәр иттеләр.

Макарон һәм бөртекле эшләнмәләр бәяләре 2017 елның июленә караганда 9,7 процентка, шикәр 11,1 процентка кимегән. Кыяр 17,7 процентка, бәрәңге 22,7 процентка, помидор 32 процентка, карабодай 40 процентка диярлек арзанайган.

«Бәяләр төшүгә, һава шартлары тискәре тору һәм уңыш соң өлгерү сәбәпле, узган елның июлендә яшелчә продукциясенә бәяләр арттырылу сәбәп булган. Узган ел белән чагыштырганда, икмәк һәм күмәч эшләнмәләре, майлы эремчек һәм зарарсызландырылган сөт бәяләре үзгәрешсез калган диярлек», — дип ачыклык керттеләр Милли банк матбугат хезмәтендә.

Шул ук вакытта агымдагы елның июлендә башка товарларның бәясе 3,6 процентка арткан. Бигрәк тә мотор ягулыгы һәм табак эшләнмәләренең бәяләре сизелерлек арткан. Ә мебель, электр товарлары һәм башка көнкүреш приборлары ел дәвамында 2 проценттан да артмаган. Татарстанда планшет (4,2 процентка) һәм смартфоннарга (6,3 процентка) бәя төшү дәвам итә.

Хезмәтләр бәяләренә караганда, алар ел дәвамында 2,7 процентка арткан.

«Узган елның июле белән чагыштырганда, медицина хезмәтләре бәяләре 5,9 процентка, туристлык хезмәтләре 3,7 процентка, пассажир транспорты хезмәтләре 3,3 процентка арткан. Шул ук вакытта халыкка бирелә торган кредит ставкалары 12,2 процентка кадәр кимегән», — диделәр Татарстан Милли банкында.

#инфляция #бәяләр

Сәхифәләр

Татарстан Милли банкы: Июльдә республикада азык-төлек бәяләре төште