Татарстан мөфтияте Коръән мәгънәләренең рус теленә тәрҗемәсен әзерли
Басма хәзерге вакытта нәшриятта версткалау этабында.
(Мәскәү, 17 октябрь, "Татар-информ", Алсу Исмәгыйлева). Татарстан мөселманнары Диния нәзарәте Коръән мәгънәләренең рус теленә тәрҗемәсен әзерли. Бу хакта "Татар-информ"га нәзарәтнең матбугат үзәге җитәкчесе Резеда Закирова хәбәр итте.
Коръән мәгънәләренең рус теленә тәрҗемәсе Татарстан мөфтие җитәкчелегендәге төркем тарафыннан әзерләнә.
Басма хәзерге вакытта "Хозур" нәшриятында версткада. Аны тәкъдим итү вакыты әлегә билгесез.
Бүген исә Мәскәүдә Татарстан мөфтияте Коръән мәгънәләренең татар теленә тәрҗемәсен тәкъдим итә. Чарага дин галимнәре, җәмәгать эшлеклеләре чакырулы.
"Татарча һәм русча тәрҗемәләрне әзерләү Коръәнне бастыруның Россиядәге традицияләрен торгызу, ислам мәгариф системасын һәм ислам мәгариф стандартларын булдыру, хәләл продуктлары һәм хезмәтләренең гомумфедераль бердәм стандартларын эшләү, Татарстан Республикасы Диния Нәзарәте тарафыннан Россиядә Исламның алдагы үсеше өчен нигез салу максатыннан башкарылды", - дип искәртте Резеда Закирова.